Ааспыт сууккаҕа Саха сиригэр түөрт техногеннай баһаар буолла

Сэтинньи 21 күнүнээҕи туругунан, ааспыт сууккаҕа өрөспүүбүлүкэҕэ түөрт техногеннай баһаар буолла. Бу туһунан РФ Ыксаллаах быһыы-майгы министиэристибэтин Саха сиринээҕи салаатын пресс-сулууспата иһитиннэрэр.

Сэтинньи 21 күнэ үүнэр түүнүгэр 03:25 мүнүүтэҕэ Нерюнгритааҕы баһаарынай сулууспаҕа Карл Маркс аатынан уулуссаҕа турар 5 этээстээх дьиэҕэ баһаар буолан эрэрин туһунан иһитиннэрии киирбит. Бастакы баһаарынай подразделение сэттэ мүнүүтэнэн кэлбит. Баһаар түмүгэр 0,5 квадратнай миэтэрэ иэннээх бэһис этээскэ баар тутуу бөҕө умайбыт. Баһаар биричиинэтин уонна буруйдаахтары быһаарыахтара.

Салгыы чааһынай гаражка «Toyota-Noah» массыына умайан эрэрин туһунан иһитиннэрии 08:09 мүнүүтэҕэ киирдэ. Бастакы баһаарынай подразделение кэлиитигэр массыына капота буруолуу турбут. Умайыы түмүгэр биир квардратнай миэтэрэ иэннээх массыына мотуора умайбыт. Баһаар биричиинэтэ — мотуорга дэҥ холбоһуу тахсыбытыттан буолбут. Гараж умайбатах.

Үһүс баһаар олохтоох бириэмэнэн 11:46 мүнүүтэҕэ Өймөкөөн улууһун Сордоҥноох нэһилиэгэр, Молодежнай уулуссатыгар турар гаражка таҕыста. Баһаарынайдар түөрт мүнүүтэнэн кэллилэр. Умайыы түмүгэр гараж уонна биэс тиэхиньикэ, уопсайа 100 квадратнай миэтэрэ эмсэҕэлээтэ. Баһаар биричиинэтэ, буруйдаахтар уонна хоромньу быһаарыллар.

Салгыы олохтоох бириэмэнэн 16:18 мүнүүтэҕэ 202 микрооройуоҥҥа умайыы таҕыста. Биир квадратнай миэтэрэ иэннээх бөх кутар баах умайда. Биричиинэтэ — уотунан сэрэҕэ суох туттуу. Буруйдаахтар уонна хоромньу быһаарыллыаҕа.