«Абилимпикс» доруобуйаларынан хааччахтаах дьон идэлэрин таһымын тургутар чөмпүйэнээт салҕанар

«Абилимпикс» доруобуйаларынан хааччахтаах дьон ортотугар идэ таһымын тургутар чөмпүйэнээт Дьокуускайга салҕанар. Күрэх регионнааҕы түһүмэҕэр Саха сирэ быйыл 18 хайысхаҕа кыттар. Уопсайа 134 кыттааччы үс бөлөххө — үөрэнээччилэр, устудьуоннар уонна исписэлиистэр диэн арахсан күрэхтэһэллэр.

Тыйаатыр олоҕо, быыс кэннинээҕи артыыстар түбүктэрин хамаандалар өйдөрүгэр дьүһүйэн көрөн, сайт оҥорорго түбүгүрэллэр. Онно баара-суоҕа түөрт эрэ чаас бэриллэр. Бу — веб-дизайн хайысха сорудаҕа. Күрэхтэһии ХИФУ инфраструктурнай технологияларын колледжыгар барар. Манна Дьокуускайтан уонна Бүлүүттэн алта устудьуон кытынна.

Бу кэмҥэ атын хоско үөрэнээччилэр мультимедийнай суруналыыстыкаҕа саҥа сүүрээни киллэрэргэ сүбэлэһэллэр. Максим Ходорченко ыраах Өймөкөөнтөн сылдьар. Кини оҕо эрдэҕиттэн сүһүөхтэрэ ыалдьар. Онуоха «Саха» национальнай көрдөрөр-иһитиннэрэр хампаанньа тэрийбит «Весна на НВК» аахсыйатыгар сертификат туттарбыттара. Максим экзоскелет ылынан, сыыдамннык хамсанар, кэлэр-барар буолбут. Кини суруналыыстыканы сэргиир.

Күрэхтэһии устудьуоннар үлэ булуналларыгар, үөрэнээччилэргэ идэлэрин талалларыгар көмөлөһөр. Тэрээһин быйыл төрдүс төгүлүн ыытыллар.

«Оҕолор бэйэлэрин компетенцияларынан интэриэһиргээн кэлэр буоллахтара дии, онон бу күрэхтэһии үлэлэригэр, олохторугар тирэх буолуо дии саныыбыт», — диир веб-дизайн хайысхатын сүрүн эксперэ Айталина Дедюкина.

Чөмпүйэнээт алтынньы 13 күнүгэр диэри Дьокуускайга уонна Нерюнгрига 14 араас түһүлгэнэн барыа. Кыайыылаахтар сэтинньи ыйга Москваҕа ыытыллар национальнай чөмпүйэнээккэ өрөспүүбүлүкэ чиэһин көмүскүөхтэрэ.