Ахсынньы 29 күнүгэр хотугу улуустарга бородуукта тиэрдии түмүктэниэ

Ахсынньы 29 күнүгэр Саха сирин хотугу улуустарыгар аһы-үөлү уонна табаары тиэрдии былааннаммыт кээмэйэ туолуо. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Аллайыахаҕа, Булуҥҥа, Үөһээ Халымаҕа, Дьааҥыга, Кэбээйигэ, Аллараа Халымаҕа уонна Орто Халымаҕа былааннаммыт бородуукта барыта тиэрдилиннэ. Бүгүн-сарсын Муомаҕа уонна Усуйаанаҕа рейстэр оҥоһуллаллара хаалла. Ахсынньы 29 күнүгэр былааннаммыт үлэни түмүктүөхпүт», – диэн СӨ тыа хаһаайыстыбатын миниистирин солбуйааччыта Василий Афанасьев кэпсээтэ.

Ахсынньы 28 күнүн туругунан былааннаммыт 26 рейстэн 22-тэ оҥоһуллубут. Сөмөлүөтүнэн уонна бөртөлүөтүнэн барыта 45,876 туонн бородуукта тиэрдиллибит. Ахсынньы 28-29 күннэригэр бүтэһик «күөх рейстэринэн» Муомаҕа уонна Усуйаанаҕа 11,2 туонна оҕуруот аһа уонна фрукта ыыттыллыахтаах.