Айсен Николаев «Арктика учуутала» диэн бырагырааманы үлэлэтэргэ этии киллэрдэ

НВК САХА – Үөрэх салаатын үлэһиттэрэ Атырдьах ыйынааҕы мунньахтарыгар Ил Дархан арктическай улуустарга көһөр учууталлар дьиэ ылыналларын үбүлүүр туһунан этии киллэрдэ. Бу туһунан Арктиканы сайыннарыы министиэристибэтэ иһитиннэрдэ.

Ил Дархан этэринэн, тыа оскуолаларыгар сыл ахсын 600 үлэ миэстэтэ тахсар, английскай тыл, математика, информатика, биология уонна химия учууталлара олох тиийбэттэр.

“Кыра оскуолалар сүрүн кыһалҕалара диэн идэтийбит учуутал тиийбэт, каадырдар уларыйа тураллар. Ол иһин оскуолаларга үлэни тэрийэргэ ураты сыһыан наада, учууталлар хамнастарын төлүүргэ эмиэ. Сүрүнэ диэн оскуола ханна баарыттан уонна төһө оҕолооҕуттан тутулуга суох үөрэтии тэҥ буолуохтааҕын тэрийиэххэ”, – диэтэ Айсен Николаев. 

Ол курдук Айсен Николаев хотугу улуустарга үлэлии барар эдэр учууталлары олорор дьиэнэн хааччыйар бырагырааманы сөргүтэн, “Арктика учуутала” диэн ааттыырга этии киллэрдэ.