Айсен Николаев «Биир ньыгыл Россия» баартыйа салаатын баһылыа

Россия 13 регионун баһылыктара «Биир ньыгыл Россия» баартыйатын салайыахтара, олор истэригэр Ил Дархан Айсен Николаев эмиэ киирдэ. Бу туһунан Дмитрий Медведев иилээн-саҕалаан ыыппыт партия генеральнай сэбиэтин мунньаҕар иһитиннэрдилэр.

Кандидаттары кытта көрсүһүүгэ премьер миниистир быыбарга бэйэтэ туруорунар кандидаттары баартыйа өттүттэн өйүүр практиканы тохтотор туһунан бэлиэтээтэ. Маннык көстүү быыбардааччыны буккуйарын тоһоҕолоото.

Регионнааҕы баартыйалары баһылыктар салайар буолбуттарын Дмитрий Медведев өйүүрүн биллэрдэ уонна саҥа уларыйыы көмөтүнэн миэстэтигэр нэһилиэнньэ кыһалҕатын, тугу туруорсарын баһылыктар ыкса билэллэригэр, ис кыаҕы түмэргэ уонна онтон сиэттэрэн үлэ хайысхатын салайтаралларыгар төһүү күүс буолуо диэн эттэ.

«Биир ньыгыл Россия» баартыйа регионааҕы салааларын Адыгея, Башкирия, Кабардино-Балкария баһылыктара, Приморскай уонна Ставропольскай кыраайдар губернатордара, Кировскай, Нижегородскай, Новосибирскай, Самарскай, Брянскай, Мурманскай уобаластар уонна Севастополь баһылыгын оруолун толорооччу Михаил Развожаев баһылаатылар.