Айсен Николаев: доруобуйа харыстабылын маҥнайгы сүһүөҕүн саҥардыы бырагыраамата ирдэнэр

Доруобуйа харыстабылын бастакы сүһүөҕүн саҥардыыга кэлэр биэс сылга дойду федеральнай бүддьүөтүттэн 500 млрд. солкуобай көрүллүө. Бу үп сиһилии уонна олохтоох бырагыраама оҥорбут регионнарга тыырыллыа, диэн Айсен Николаев «Саха сирэ, иннин диэки!» («Якутия, вперед!») биэриигэ эттэ.

Бу туһунан алтынньы 31 күнүгэр Калининградскай уобалас Светлогорск куоратыгар Россия бэрэсидьиэнэ Владимир Путин ыыппыт мунньаҕар дьүүллэспиттэр.

«Регионнар тустаах хайысхаҕа бырагыраама оҥоруохтаахтар. Россия доруобуйа харыстабылын министиэристибэтин кытта сөбүлэһиннэриини ааһардан баран, 2020 сыл бастакы аҥарыгар ылыныллыахтаах. Оччотугар бу хайысхаҕа үбүлээһин көрүллүө», – диэн Ил Дархан кэпсээтэ.

Тоҕоостоох уонна үрдүк хаачыстыбалаах маҥнайгы суһал уонна медицинскэй-санитарнай көмөнү саҥардыы бырагырааматын көмөтүнэн, Саха сиригэр саҥа фельшер-акушер пууннарын уонна улуустар киин балыыһаларын тутуу, Дьокуускай куорат балыыһаларын хапытаалынай өрөмүөнүн үлэтин ыытыы уонна да атын суолталаах боппуруостары быһаарыахха сөп, диэн өрөспүүбүлүкэ баһылыга бэлиэтээтэ.