Айсен Николаев Эбээн-Бытантай социальнай экономическэй сайдыытын хайысхаларын дьүүллээтэ

Ил Дархан Айсен Николаев Эбээн Бытантай улууһугар 2030 сылга диэри социальнай экономическэй сайдыытын хайысхаларын дьүүллүүр уонна улууска ыыппыт үлэтин түмүктүүр мунньаҕы тэрийэн ыытта. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Эбээн-Бытантай улууһун баһылыга Гаврил Горохов тыа хаһаайыстыбата улуус экономикатын төрүтэ буоларын бэлиэтээтэ.

«Биһиги тыа хаһаайыстыбатын үс хайысхатынан үлэлиибит. Ол курдук табаны, ынаҕы уонна сылгы үөрүн иитиитинэн дьарыктанабыт. Биһиги улууспутугар өрөспүүбүлүкэ 9,9 % табата киирсэр. Ааспыт сылтан таба ахсаана бигэтийдэ онон быйыл биһиги улууспут Арктика улуустарын иһигэр өрөспүүбүлүкэ үрдүнэн төрдүс миэстэҕэ сылдьар», — диэн Гаврил Горохов эттэ.

Бүгүҥҥү күҥҥэ улуус үрдүнэн 13 тыһыынча таба төбөтө ааҕылларын эбэн эттэ. 2030 сылга улуус дьаһалтата таба төбөтүн ахсаанын 34% диэри элбэтэр санаалаахтар.

Улуус территориятыгар ртуть, үрүҥ көмүс, хоҕолдьун уонна онтон да атын сиртэн хостонон туһалаах баай баар.

Кэлэр өттүнээҕи социальнай экономическэй сайдыы хайысхатынан туризм уонна урбаан буолар. Эбээн-Бытантай улууһа төһө да сылдьарга эрэйдээх улуус буолубтун үрдүнэн бэрт көхтөөхтүк сайдан иһэрин Айсен Николаев бэлиэтээтэ.

«Эбээн-Бытантай улууһа демография өттүгэр кытары үчүгэй көрдөрүүлээх. Арктика улуустарыгар нэһилиэнньэтин ахсаана аҕыйаабакка улаатан иһэр улуустар истэригэр киирсэр», — диэн Айсен Николаев кэпсээтэ.

Улуус сайдыытын сүрүн хайысхатынан тыа хаһаайыстыбата буоларын Ил Дархан бэлиэтээтэ.

«Биллэн турар бу төрүт салааны өйүөххэ наада. Итини барытын биһиги урабаанньыттар уонна төрүт общиналар салайааччыларын кытта дьүүллэстибит. Хайдах, ханнык хайысханан үлэлиир туһунан биир санааҕа кэллибит. Мин улуус инникитин сайдан иһиэҕэ диэн эрэнэбин», — диэн Айсен Николаев биллэрдэ.

Тохсунньу 22 күнүгэр Ил Дархан 270 ынах төбөтө ааҕыллар «Бытантай» сүөһү иитэр комплексатыгар сырытта. 2018 сыллаахха предприятие 120 миэстэлээх хотон туттубута.

Бүгүҥҥү күҥҥэ уопсайа Эбээн-Бытантай улууһугар хаһаайыстыба бары категорияларыгар 790 ынах төбөтө ааҕыллар.

Ил Дархан улуус дьаһалтатыгар уонна саха сүөһүтүн боруодатын иитиитинэн дьарыктанар дьоҥҥо махталын тириэртэ.