Айсен Николаев Егор Борисовы үбүлүөйүнэн эҕэрдэлээтэ

Ил Дархан Айсен Николаев судаарыстыбаннай сүбэһит, РФ Федеральнай мунньаҕын Аграрнай бэлиитикэ уонна айылҕаны туһаныы кэмитиэтин бэрэссэдээтэлин солбуйааччы Егор Борисовы 65 сааһынан эҕэрдэлээтэ.

“Бүгүн Егор Борисов үбүлүөйүн бэлиэтиир. Эппит тылыгар турар, кытаанах бириинсиптээх киһи. Хас биирдии бөдөҥ бэлиитик, салайааччы туспа истииллээх буолар. Егор Афанасьевич дьиҥ сахалыы майгытын сыаналыыбын, кини – прагматик, онон үлэ көстүүтэ эрэ буолбакка, көдьүүһэ, түмүктээх буолара киниэхэ улахан суолталаах”, – диэн Ил Дархан Инстаграм ситимигэр суруйар.

Егор Борисов салайар кэмнэрэ уустук быһаарыыны ылынарга дьон санаатыгар тирэҕирэргэ, дьоҥҥо эрэнэргэ, итэҕэйэргэ үөрэппиттэрэ диэн Николаев бэлиэтиир.

“Ис сүрэхпиттэн Егор Афанасьевиһы үбүлүөйүнэн эҕэрдэлиибин, төрөөбүт өрөспүүбүлүкэтин, дойдутун туһугар Федерация Сүбэтигэр салгыы ситиһиилээхтик үлэлииригэр, кытаанах доруобуйаны, табыллыыны, иллээх-эйэлээх дьиэ кэргэнигэр дьолу баҕарабын”, – диэн Ил Дархан түмүктээтэ.