Айсен Николаев Ленинград блокадатын кыттыылаахтарын кытта көрүстэ

Ил Дархан Айсен Николаев Ленинград куорат фашисткай аармыйа блокадатыттан босхоломмута 76-с сылын көрсө, блокада кыттыылаахтарын уонна бэтэрээннэр уопсастыбаннай тэрээһиннэрин актыыбын кытта көрүстэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Тэрээһин СӨ национальнай ойуулуур-дьүһүннүүр түмэлигэр ыытылынна. Күн бүгүн Дьокуускай куоракка 21 Ленинград блокадатын кыттыылааҕа олорор. Кинилэри барыларын Дьоруой-куорат Ленинград блокадатыгар түбэспит дьон аан дойдутааҕы ассоциацияларын өрөспүүбүлүкэтээҕи салаата түмэр.

«Ленинград куорат фашист төгүрүктээһиниттэн бүтэһиктээхтик босхоломмут күнэ — улуу алдьархайдаах бырааһынньык. Блокада 872 күн устата салҕаммыта. Үс мөлүйүөн кэриҥэ нэһилиэнньэлээх куораттан, 500-тэн тахса тыһыынча эрэ киһи ордубута. Билигин блокада дьылларыгар куорат балтараа мөлүйүөн кэриҥэ олохтооҕо ыар дьылҕаламмыта этиллэр. Биһиги ытык иэспитинэн — дьиҥ-чахчы устуоруйаны уонна бу алдьархайдаах кэм түбэлтэлэрин харыстаан өйдүү сылдьыы уонна үүнэр көлүөнэ ыччакка тириэрдии буолар», — диэн Айсен Николаев эттэ.

Көрсүһүү кэмигэр блокада кыттыылаахтарын ааттарыттан оҕолоро тыл эттилэр. Кинилэр бэйэлэрэ уопсастыбаннай түмсүү тэрийэн, өрөспүүбүлүкэтээҕи үөрэх кыһаларын кытта үлэлэһэллэр, оскуола оҕолоругар кылаас чаастарын уонна оскуола таһынааҕы тэрээһиннэри ыыталлар.

«Кыайыы волонтердара» бүтүн Россиятааҕы хамсааһын Саха сиринээҕи салаатын салайааччыта Алгыс Петров иһитиннэрбитинэн, бүгүҥҥү күҥҥэ уопсастыба өрөспүүбүлүкэ бары улуустарыгар бэрэстэбиитэллээх.

Ил Дархан бу көрсүһүү Улуу Кыайыы үбүлүөйдээх 75-сылыгар ананар тэрээһиннэри арыйарын бэлиэтээтэ.