Айсен Николаев: мин соругум — «Биир ньыгыл Россия» баартыйаҕа дьон итэҕэлин төннөрүү

«Биир ньыгыл Россия» баартыйа салаатын баһылыга буоларым быһыытынан, баартыйаҕа дьон итэҕэлин төннөрүүнү тус бэйэм сорукпунан туруорабын. Диэн Ил Дархан Айсен Николаев «Саха сирэ, иннин диэки!» («Якутия, вперед!») биэриигэ кэпсээтэ.

«Сүрүн сорук — дьон итэҕэлин төннөрүү. Хомойуох иһин, кэлиҥҥи сылларга дойдуга уонна өрөспүүбүлүкэҕэ тахсыбыт араас биричиинэнэн, баартыйа дьон итэҕэлин сүтэрдэ. Баартыйа норуоттан тэйдэ. Сорох биир баартыйалаахтарым олохтоох нэһилиэнньэ үгүс кыһалҕатын маҥнайгы күөҥҥэ туруорбат буоллулар», — диэн Ил Дархан бэлиэтээтэ.

Дойду бэрэсидьиэнэ Владимир Путин баартыйа сүбэ мунньаҕар норуот итэҕэлин төннөрүүнү, нэһилиэнньэни кытары ыкса үлэлэһии туһунан эппит тыллара, бэйэм иннибэр туруорар соруктарбын кытары сөпсүһэллэр.

«Биһиги баартыйаҕа боростуой дьону тардыахтаахпыт, кинилэр иннилэрин көмүскүөхтээхпит. Мин санаабар сорох биир баартыйалаахтарбыт «Биир ньыгыл Россия» баартыйа кэккэтигэр сылдьалларынан туһанан, былаас уонна баартыйа аатын холуннараллар. Маннык быһыыны-майгыны дьүүллүөхпүт уонна кытаанах миэрэлэри ылыахпыт», — диэн Айсен Николаев тоһоҕолоон эттэ.