Айсен Николаев Нерюнгрига уу ситимин саҥардыыны болдьоҕор ситэрэргэ соруйда

Ил Дархан Айсен Николаев Нерюнгрига уу ситимин саҥардыы үлэтин болдьоҕор ситэрэр туһунан соруйда.

Нерюнгри куорат уонна Серебряный Бор бөһүөлэгэ сир аннынааҕы источниктартан Омулинскай, Үөһээ Нерюнгритээҕи уонна Нерюнгритээҕи ууну оботторор станциялартан уунан хааччыллар. Эбийиэктэр 1970-с сыллардаахха тутуллубуттар, 159 килэмитиэр усталаах ситимнэр туһаттан тахсыылара 98 %-ҥа тэҥнэспитэ бэлиэтэнэр.

Уу ситимнэрин саҥардыы үлэтэ икки түһүмэҕинэн өрөспүүбүлүкэ экономикатын сайыннарар кииннэр социальнай сайдыыларын былаанынан ыытыллар. Бу үлэлэри ыытыыга уопсайа 400 мөлүйүөн солкуобай көрүллэн турар: 396 мөлүйүөн солкуобай судаарыстыбаннай хааһынаттан, түөрт мөлүйүөн солкуобай өрөспүүбүлүкэ бүддьүөтүттэн.

Ил Дархан Айсен Николаев Нерюнгри оройуонугар үлэ сырыытын кэмигэр Омулинскай ууну оботторор станцияҕа сылдьан, саҥардыы үлэтин маҥнайгы түһүмэҕин олоххо киллэрии боппуруостарынан мунньах ыытта. Маҥнайгы түһүмэххэ Омулинскай ууну оботторор станцияҕа икки ыраас ууну хаайар сир үрдүнээҕи резервуар уонна Үөһээ Нерюнгритээҕи ууну оботторор станция үһүс уонна төрдүс тахсыыларыгар носуостары саҥардыы ыытыллыахтааҕа этиллэр.

«Инженерные сети Проект» ХЭУо бэдэрээтчит быһыытынан 2019 сылга 211 мөлүйүөн солкуобай сыаналаах тээбириннэри атыылаһан, 2020 сылга таҥыыга киирсиэхтээх.

Ил Дархан өрөспүүбүлүкэ дьаһалтатыгар үлэ иккис түһүмэҕин эбийэктэрин бырайыактыыр уонна сметалыыр үлэлэри хайыы үйэ саҕалыахха наадатын туһунан тустаах соругу биэрдэ.