Айсен Николаев «Пугало» киинэ хамаандатын наҕараадалаата

Ил Дархан Айсен Николаев «Кинотавр» киинэ бэстибээлигэр бастыҥ киинэ аатын сүкпүт «Пугало» киинэ устар хамаандатын кытта көрүстэ.

Режиссер Дмитрий Давыдов, cүрүн оруолга оонньообут Валентина Романова-Чыскыырай уонна оператор Иван Семенов махтал суругунан уонна 3 мөлүйүөн солкуобайдаах сертификатынан наҕарааланнылар.

«Кинотавр» бэстибээл 31 сыллаах историятын тухары саха киинэтэ маннык улахан сыанабылы ыла илик. Үксүгэр дьүүллүүр сүбэ санаата араастаһааччы. Кинилэр «Пугало» киинэни бары бастыҥынан быһаарбыттара киинэ уһулуччулааҕын бигэргэтэр», — диэтэ Айсен Николаев. Режиссер Дмитрий Давыдов бу саха киинэтин бүттүүн ситиһиитэ диэн бэлиэтээтэ.

«Биһиэхэ, Саха сиригэр киинэ эйгэтэ биир сүрүн искусство буолар. Киинэ устара төһөлөөх элбэх сыра-сылба уонна үп-харчы баранара өйдөрөр. Онон салгыы даҕаны өйүөхпүт», — диэтэ Ил Дархан.

Санатан эттэххэ, «Пугало» киинэ киэҥ экраҥҥа 2021 сылга тахсыан сөп.

Киинэҕэ дэриэбинэҕэ олорор айылҕаттан айдарыылаах эмчит дьахтар туһунан көстөр. Дьон киниттэн тэйиччи сылдьар, кыһалҕа тирээтэҕинэ, эмтэтэ кэлэллэр. Эмчит бэриллибит күүһэ кинини бэйэтин сиэн сөбүн билэр эрээри, дьону эмтиирин тохтоппот.