Айсен Николаев Уһук Илиҥҥэ саамай биллиилээх салайааччынан буолбут

Ил Дархан Айсен Николаев «ФедералПресс» медиахолдинг версиятынан Россия Уһук Илиҥҥи уокуругун губернатордарын Instagram рейтинигэр бастакы миэстэни ылбыт.

«Уһук Илин саамай биллиилээх Instagram-губернаторынан быйыл Саха сирин баһылыга Айсен Николаев буолла: кини Instagram аккауна 160 тыһыынча сурутааччылаах», – диэн этиллэр.

Өрөспүүбүлүкэ баһылыгын сорох постара сэттэ тыһыынчаҕа тиийэ лайк ылаллара бэлиэтэнэр. «Саха сирин дьиҥнээх Саҥа дьыллааҕы хиттарыттан» биирдэстэринэн Тиксии олохтоохторо Тымныы оҕонньор, Снегурочка уонна 2021 сыл бэлиэтэ көстүүмнэрдээх буурҕа кэмигэр саҥа дьыллааҕы харыйа уотун уматыылара буолар.

«Ахсынньы 1 күнэ. Саха сирэ. Тиксии. Сөкүүндэҕэ 34 миэтэрэ тыал. Кыһын Саха сириттэн саҕаланар», – диэн Айсен Николаев пост анныгар суруйбут.

Ону тэҥэ рейтиҥҥэ Приморскай кыраай губернатора Олег Кожемяко (113 тыһыынча сурутааччылаах), Амурскай уобалас губернатора Василий Орлов (100 тыһыынча сурутааччылаах ), Хабаровскай кыраай губернаторын э.т. Михаил Дегтярев (81,2 тыһыынча сурутааччылаах) уонна Бурятия баһылыга Алексей Цыденов (76,1 тыһыынча сурутааччылаах) киирбиттэр.