Айсен Николаев улуустар олохтоохторун изоляцияланарга ыҥырда

Өрөспүүбүлүкэ улуустарыгар коронавируһунан ыалдьыы түбэлтэтэ бэлиэтэммэтэҕэ бэйэ изоляциятыттан акаастаныы төрүөтүнэн буолуо суохтаах. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата тириэрдэр.

Бүгүн, кулун тутар 30 күнүгэр Ил Дархан Айсен Николаев өрөспүүбүлүкэ улуустарын уонна куорат уокуруктарын кытта видео сибээс нөҥүө эпидемиологическэй турук боппуруостарынан мунньах ыытта.

«Бэйэҕит боломуочуйаҕыт кыаҕынан дьон улуус уонна өрөспүүбүлүкэ иһинэн сырыытын хааччахтыырын, улахан булгуччулаах наадата суох дьиэттэн тахсыбатын ситиһиэхтээххит. Өрөбүл нэдиэлэтэ — уоппуска буолбатах. Бу быһыы бэйэ изоляциятын ситиһэргэ оҥоһуллар», – диэн Айсен Николаев эттэ.

Сорох улуустарга медицинэ тэрилтэлэрин, полиция уорганнарын уонна улуус олоҕун хааччыйар тэрилтэлэр үлэһиттэригэр оҕолоругар анаан дьуһуурунан уһуйааннар үлэлииллэрэ бэлиэтэнэр.

Маны таһынан, Ньурба улууһугар кыаммат ыаллар оҕолорун босхо сылаас аһылыгынан хааччыйыы тэриллибитэ этиллэр.