Айсен Николаев: видеоблогум сүрүн сыала – Саха сирин интэриэһинэй дьону кытта билиһиннэрии

Ил Дархан Айсен Николаев YouTube сайтыгар арыйбыт видеоблога Саха сирин олохтоохторун интэриэһинэй дьону-сэргэни уонна аан дойдуга баар араас олох көстүүтүн кытта билиһиннэрэр сыаллаах буоларын «Саха сирэ, иннин диэки!» («Якутия, вперед!») биэриигэ кэпсээтэ.

«Сайдыы түргэн тэтимнээхтик киирэригэр аан дойду үрдүнэн олох усулуобуйаларын тэрийиигэ оҥоһуллубут үчүгэй үлэлэри уонна өрүттэри олоххо көхтөөхтүк туһанар, куораттары хайдах уларыталларын, дьону хайдах көҕүлүүллэрин, олоххо үгэс буолбут быһыыга сыһыаннара хайдах төлөрүйэрин, ол түмүгэр регион олоҕо хайдах тупсарын билэр-көрөр наада», – диэн Айсен Николаев бэлиэтээтэ.

Видеоблогун ыалдьыттарынан өрөспүүбүлүкэ сайдыытыгар туораттан көрөн сүбэ-ама биэрэр кыахтаах дьон буолуохтара диэн кэпсээтэ.

Ил Дархан аныгыскы видеота сотору кэминэн YouTube-ка тахсарын иһитиннэрдэ. Таһаарыы лекторий тиэмэтигэр ананыа диэтэ.