Айсен Николаев «Земскэй учуутал» бырагыраама туһунан ыйааҕы бигэргэттэ

Ил Дархан Айсен Николаев Саха сиригэр «Земскэй учуутал» бырайыак үлэлиир бэрээдэгин уонна субсидия бэриллэр ирдэбилин бигэргэтэр ыйаахха илии баттаата. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Саҥа бырагыраама өрөспүүбүлүкэ кыра куораттарыгар уонна тыатын сиригэр үөрэх кыһаларыгар учуутал тиийбэт буолуутун быһаарыыга туһаайыллар.

«Земскэй учуутал» кыттааччы 50 тыһыынчаҕа тиийэ нэһилиэнньэлээх куораттарга уонна нэһилиэнньэлээх пууннарга көһүөн сөп. Эбии төлөбүр 55-гэр диэри саастаах орто анал, эбэтэр үрдүк үөрэхтээх учууталларга көрүллэр.

Куонкуруһунан талыыга кытааччы билигин олорор уонна үлэлиир муниципальнай тэриллиитэ эбэтэр куорат уокуруга ылыллыбат. Көһөн үлэлии барар сирэ билигин олорор сириттэн 200 килэмиэтиртэн тахса тэйиччи буолуохтаах.

Инники этилибитинэн, дойду бэрэсидьиэнэ Владимир Путин «Земскэй учуутал» бырагырааманы дойду таһымыгар олохтуур туһунан этиини Сүбэ мунньахха анал туһаайыытын кэмигэр иһитиннэрбитэ.