Акана сэлиэнньэтигэр 100 төбө сүөһүгэ аналлаах хотон үлэҕэ киирдэ

Саха сүөһүтүн иитэргэ анаан Ньурбаҕа Акана сэлиэнньэтигэр 100 төбө сүөһүнү батарар саҥа хотон үлэҕэ киирдэ. Бу туһунан СӨ Тыа хаһаайыстыбатын министиэристибэтэ иһитиннэрэр.

«Биһиги сорукпут — саха ынаҕын ууһатыы, оҥорон таһаарыыны үксэтии. Ол туһугар усулуобуйа барыта оҥоһулунна», — диэн өрөспүүбүлүкэ тыатын хаһаайыстыбатын бэтэрээнэ Федот Бускаров бэлиэтээтэ.

Бу 2020 сылга аһыллыбыт үһүс хаһаайыстыба буолар. Манна тэҥнээх, 150 төбө сүөһүгэ аналлаах хотоннор Намҥа уонна Миирнэйгэ үлэҕэ киирбиттэрэ. Кэлэр сылларга Горнайга, Үөһээ Бүлүүгэ уонна Аммаҕа хотон тутуллара былааннанар.

Саха ынаҕын иитиинэн өрөспүүбүлүкэ 14 улууһун 20 нэһилиэгэр уонна Дьокуускай куоракка дьарыктаналлар. 2020 сыл алтынньы 1 күнүгэр киин улуустарга 885 төбө, Арҕаа Саха сирин үс улууһугар — 437 төбө, хотугу бөлөх биэс улууһугар — 1 118 саха сүөһүтэ, ол иһигэр 975 төбө Эбээн Бытантай улууһугар баар.

2024 сылга диэри саха сүөһүтүн ахсаана үс тыһыынча төбөҕө тиийиэхтээх, ол иһигэр ыанар ынах ахсаана биир тыһыынча төбөҕө диэри. «Саха сүөһүтэ» хааһына тэрилтэтэ уонна хаһаайыстыба базалара боруоданы чөлүгэр түһэрэргэ сэдэх геннээх тииптэри көрдөөн саҕалаатылар. Дьокуускайдааҕы тыа хаһаайыстыбатын чинчийэр института наука өттүттэн арыаллыыр.