Алдаҥҥа буолбут баһаарга эр киһи өлүгүн булбуттар

Алдан оройуонун Томмот бөһүөлэгэр түөрт кыбартыыралаа дьиэҕэ тахсыбытын баһаар оннугар эр киһи өлүгэ көстүбүт. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

Баһаар буолбутун туһунан иһитиннэрии бүгүн олунньу 23 күнүгэр күнүс 11.36 чааска киирбит. Алданнааҕы баһаарынай-быыһыыр горнизон үлэһиттэрэ умайа турар дьиэттэн дьахтары быһаабыттар. Билиҥҥи кэмҥэ эр киһи ким буолара быһаарыллар.

Баһаар түмүгэр дьиэ сарайа уонна 80 квадратнай миэтэрэ иэннээх сиринэн биир кыбартыыра эмсэҕэлээбит. Уоту умуруорууга 29 киһи уонна алта тиэхиньикэ кыттыыны ылбыт.

Быһылаан тахсыбыт биричиинэтин быһаарыыга оннугар ЫБММ дознавателлэрэ, ону тэҥэ силиэстийэлиир кэмитиэт силиэдэбэтэллэрэ уонна криминалистар үлэлииллэр.