Алдан библиотеката көрбөт дьоҥҥо анал оборудование ылла

Алдан оройуоннааҕы киин билиотеката мөлтөхтүк көрөр уонна көрбөт ааҕааччыларга ананар оборудованиены ылла. Бу туһунан СӨ култуураҕа министиэристибэтин пресс-сулууспата иһитиннэрэр.

Библиотекаҕа клавиатуранан көхтөөхтүк туһанар көрбөт ааҕааччылар үлэлииллэригэр ананар бырагыраамалаах ноутбук турар үлэ миэстэтэ олохтонно. Оборудование Россия бэрэсидьиэнэ Владимир Путин этиитинэн тэриллибит «Култуура» национальнай бырайыак чэрчитинэн ылылынна.

«Скайпынан кэпсэтии, социальнай ситимнэр нөҥүө суруйсуу, сонуннары билии-көрүү, бу мөлтөхтүк көрөр уонна көрбөт дьон анал үлэ миэстэтиттэн ылар кыахтарыттан сорҕото эрэ буолар. Биһиги билиотекабытыгар саҥа өҥө буолар», — диэн Некрасов аатынан Алданнааҕы библиотека дириэктэрэ Наталья Речистер кэпсээтэ.

Алданнааҕы библиотекаҕа өрөспүүбүлүкэ бүддьүөтүттэн уопсайа 1,3 мөлүйүөн солкуобай көрүллүбүтэ. Бу үп уопсастыбаннай библиотека хааччыллыытын саҥардыыга, виртуальнай экскурсияны уонна да атын бырайыактары олоххо киллэриигэ ыытыллыаҕа.

«Култуура» национальнай бырайыак чэрчитинэн өрөспүүбүлүкэ уопсайа биэс билиотеката үбүлэммитэ. Алдан уонна Томмот оройуннарын библиотекаларын хааччыйыыга уонна саҥардыыга 1,3 мөлүйүөннүү солкуобай көрүллүбүтэ, Нам, Өлөөн уонна Уус Алдан библиотекаларыгар — 800-түү тыһыынча солкуобай.