Алдан экологтара саҥа тиэхиньикэ туттулар

Госэконадзор Алданнааҕы кэмитиэтэ «Трекол» мааркалаах улахан көлөһөлөөх үрдүк сылдьар кыахтаах массыынаны уонна хаарынан айанныыр көлөнү ылла. Бу туһунан Алдан оройуонун дьаһалтатын пресс-сулууспата иһитиннэрэр.

«Тиэхиникэнэн олохтоох айылҕа ураты харыстанар сирдэрин көрөргө ананар. «Айылҕа ураты харыстанар сирдэрэ уонна биологическай саппаас баай» диэн улуустааҕы бырыгырамма үбүлээһинин улаатыннарыы көмөтүнэн, бу тиэхиньикэлэр ылылыннылар», — диэн этиллэр.

Алдан оройуонугар, муниципальнай тэриллии уопсай иэнин 20 %-ын ылар, 12 айылҕа ураты харыстанар сирэ баара бэлиэтэнэр. Онон саҥа тиэхиньикэ экологтар кэтээн көрүүлэри ыыталларыгар эбии күүс буолуо.

СӨ экология министиэристибэтин көрдөрүүтүнэн, Алданааҕы айылҕа харыстабылын кэмитиэтэ бырамыысыланнай оройуоннар ортолоругар 2019 сыл түмүгүнэн бастыҥ үлэлээҕинэнэн бэлиэтэннэ.