Алена Дмитриева олорон эрэ оонньуур волейболга Европа үс төгүллээх чемпиона буолла

Токиоҕа ыытыллыбыт Паралимпийскай оонньуулар кыттыылааҕа, саха кыыһа Алена Дмитриева олорон эрэ оонньуур волейболга Европа күрэхтэһиитигэр Россия хамаандатын састаабыгар киирсэн кыһыл көмүс мэтээли ылла. Бу туһунан НКИХ «Саха» иһитиннэрэр.

Россия хамаандата бөлөххө Венгрияны, Украинаны, Италияны кыайбыта, плей-оффка Польшаны, Словенияны хоппута. Финалга Россия Италияны 3:0 ахсаанын кыайан бастаабыта.

Алена, алтынньы 13 күнүгэр, дьиэтигэр олорбут, ол кэмҥэ киниэхэ старшай тренерэ эрийэн, Россия сүүмэрдиир хамаандатыгар киллэрбитин туһунан иһитиннэрбит.

«Түргэнник билиэт атыылаһан баран 14-с чыыһылаҕа Москваҕа айаннаабытым, ол кэнниттэн 15-с чыыһылаҕа Турцияҕа көппүппүт. Күрэхтэһиибит Кемер диэн куоракка ыытыллыбыта», — диэн Алена эттэ.

Олорон эрэн волейболга Европа күрэхтэһиитигэр уопсайа 17 дойду кииристэ. Уолаттарга Италия уонна Франция хамаандата бастакытын кытыннылар. Алена сэттэ оонньууттан биэһигэр оонньообут.

«Европа күүстээх хамаандата — Россия. Ону тэҥэ Италия кэлин икки сылларга Европа күрэхтэһиитигэр ситиһиилээхтик кыттар буолла. Голландия уонна Укриана урут күүскэ оонньууллар этэ. Билигин састааптара уларыйбыт буолан, хамаандалар таһымнара арыый да түспүт курдук. Күрэхтэһии этэҥҥэ ааста», — диэн Алена Дмитриева кэпсээтэ.

Алена Паралимпиада кэнниттэн спортан тохтуурга былааннаммыт. Ол гынан баран кини хамаандатын бырахпатах, Европа күрэҕэр кыттарга үөрэ-көтө сөбүлэспит.

«Мин биир да сбору ааспатаҕым. Саха сиригэр биирдэ эрэ бэлэмнэммитим. Ол иһин оннук тиийэммин оонньуум табылынна диэххэ сөп. Холобур, бэлэмнэммитим буоллар өссө үчүгэйдик киирсиэм этэ диэн санааҕа кэллим», — диэн Алена кэпсээтэ.

Алена күрэхтэһиигэ тас кимэн киирээччи амплуаҕа оонньоото.