Алгысчыт Иван Васильев — Алгыс Уйбаан: «Тыл — улуу күүс»

«Саха итэҕэлэ» биэриигэ алгысчыт Уйбаан Баһылайап — Алгыс Уйбаан ыалдьыттаата.

Алгыс Уйбааны үгүс дьон көрөн да, истэн да билэр буолуохтаах. Кини Туймаада туонатын ыһыаҕа Үс Хатыҥҥа ыһыллар буолуоҕуттан ыла ыһыах алгыһын аҕыс халлаан арчыһыттарыттан, тоҕус халлаан дуомньуттарыттан, Үрдүк Айыылартан, ытык иччилэртэн үҥэн-сүктэн көрдөһөн, түһэрэн, үгүс ыһыах алгыһын сиэрин-туомун оҥорон кэллэ.

«Киһи ылбычча алгысчыт буолан хаалбат. Барыта ситимнээх-сибээстээх буолуон сөп. Ол иһин, ырааҕынан эргитэн көрдөххө, киһи төрөппүттэрин булан, оҕо буолан кэлэр. Мин төрөппүттэрим уус-уран тыллаах, сахалыы майгылаах, санааларын сөпкө, чопчу этэр үтүө дьон этилэр», — диир Алгыс Уйбаан.

Уйбаан этэринэн, онон дьонуттан бэриллибит буолуон сөп.

«Оччолорго, оҕо уһуйаана суох эрдэҕинэ, абаҕабыт оҕонньор миигин оҕолообут. Ордьоох Сэргэй диэн улууска биллэр оһуохайдьыт киһи этэ. Кини тойугун, оһуохайын , олоҥхотун уу дьулайбар элбэхтик ыллаабыт, мин ону олоотоон истэр үһүбүн. Ол кута-сүрэ испэр иҥмититтэн буолуо — оһуохайы оҕо сылдьан наһаа сөбүлүүр этим», — диэн Алгыс Уйбаан кэпсиир.

Уйбаан талан ылбыт идэтэ — саха тыла. Тыл өйү-санааны, билиҥҥи эйгэни кытта сөпкө дьүөрэлэстэҕинэ, үтүөкэннээх, улууканнаах күүс буоларын бэлиэтиир.

Салгыы «Саха итэҕэлэ» биэриигэ көрүҥ.