Аллараа Бэстээхтэн Чурапчыга диэри суолу 2022 сылга толору асфаллыахтара

«Халыма» федеральнай айан суолун Аллараа Бэстээх бөһүөлэгиттэн Чурапчы сэлиэнньэтигэр диэри учаастагын 2022 сылга диэри толору асфаллааһын былааннанар. Бу туһунан «Бүлүү» суол управлениетын пресс-сулууспата иһитиннэрэр.

«Халыма» Р-504 федеральнай айан суолун сайыннарыы бырагырааматын чэрчитинэн кыараҕас сирдэриоҥоруу уонна нэһилиэнньэлээх пууннар кыраныыссаларынан ааһар учаастактары ирдэбилгэ эппиэттиир турукка киллэрии ыытыллара бэлиэтэнэр.

«Бүлүү» суол управлениета 2022 сылга диэри «Халыма» айан суолун Аллараа Бэстээх бөһүөлэгиттэн Чурапчы сэлиэнньэтигэр диэри учаастагын толору алфальт бүрүһүөннүүр былааннаах», — диэн этиллэр.

Бүгүҥҥү күҥҥэ «Куобах туһаҕа» («Заячья петля») 662–692 килэмиэтирдээх уонна «Алларааҥҥы сыстыы» («Нерский прижим») 1121-1142 килэмиэтирдээх учаастактарга уопсай 47 килэмиэтирдээх кэрчиккэ үлэ ыытыллар. Үлэҕэ киллэрии 2024 сылга торумнаммыт.

Ону тэҥэ 2020 уонна 2021 сылларга үлэҕэ киллэриигэ торумнаммыт 50–65 км, 78–90 км, 135-142 км, 142–149 км, 149–163 км уонна 465–470 килэмиэтирдээх учаастактарга хапытаалынай өрөмүөн ыытылла турар.

50-65 килэмиэтирдээх учаастак үлэтэ бүтэһик түһүмэххэ тиийдэ. Манна сир болотунатын, суол таҥаһын, ууну аһардар турбалары туруоруу уонна бөҕөргөтүүнү үлэлэрэ 100 %-н туоллулар. Билигин суол бэлиэлэрин, сигнальнай остуолбалары, ууну түһэр лотоктарын туруоруу ыытыллар.