Аллараа Бэстээхтэн Төҥүлү сэлиэнньэтигэр диэри суол учаастага толору асфальтанна

Мэҥэ Хаҥалас улууһугар «Халыма» айан суолун Аллараа Бэстээхтэн Төҥүлү сэлиэнньэтигэр диэри учаастага толору асфальтанна.

Федеральнай айан суолун 50 – 65 килэмиэтирдэрин икки ардын учаастага асфальт бүрүһүөннэннэ. 2019 сылга 36 – 50 уонна 65 – 78 килэмиэтирдэргэ уопсайа 27 килэмиэтирдээх суол учаастага оҥоһуллубута.

«Бүлүү» айан суолларын управлениета 2022 сылга диэри Аллараа Бэстээхтэн Чурапчыга диэри суол учаастагы толору асфальт бүрүһүөннүүр былааннаах. Ону тэҥэ «Халыма» айан суолун 350 – 374 килэмиэтирдээх учаастагар баар Алдан өрүһү туоруур муоста тутуутун бырайыагын үлэтэ саҕаланна.

А-331 «Бүлүү» федеральнай айан суолун Иркутскай уобалас Верхнемарково бөһүөлэгиттэн Таас Үрэх бөһүөлэк уонна Миирнэй куорат нөҥүө Дьокуускайга диэри уонна Р-504 «Халыма» федеральнай айан суолун Дьокуускайтан Магадан уобалаһын кыраныыссатыгар диэри уопсайа 3301 килэмиэтир усталаах суол учаастага «Бүлүү» айан суолларын управлениетын көрүүтүгэр-истиитигэр сылдьар.