АЛРОСА Дубайга $7,4 мөл. долларга алмаастары атыылаабыт

2020 сыл ахсынньытыгар АЛРОСА хампаанньа Дубайга 10,8 караттан бөдөҥ алмаастарга аукцион ыыппыт. Бу туһунан хампааннта пресс-сулууспата иһитиннэрэр.

«АЛРОСА 2020 сылга бүтэһик аукциона Дубайга ыытыллан ситиһиилээхтик түмүктэннэ. Атыыга таһаарыллыбыт ассортимент 90 %-тан тахсата атыыланна. Бу саҥа дьыллааҕы бырааһынньыктар иннилэринэ биһиги бородууксуйабыт интэриэһи тардарын туһунан этэр», — диэн хампаанньа генеральнай дириэктэрин солбуйааччыта Евгения Агуреева кэпсээтэ.

Уопсайа 2100 карат ыйааһыннаах 138 алмаас атыыламмыта бэлиэтэнэр. Бельгияттан, Израильтан, Индияттан уонна ХАЭ-тан 35 хампаанньа атыыласпыт. Атыыттан киирбит үп кээмэйэ 7,4 мөлүйүөн долларга тэҥнэспит.