АЛРОСА Гонкоҥҥа 10,3 мөлүйүөн доллардаах алмааһы батарда

НВК САХА – АЛРОСА хампаанньа Гонкоҥҥа 10,8 караттан үөһэ ыйааһыннаах алмаастары атыылыыр аукциону ыытта. Ол түмүгэр барыта 1910 карат ыйааһыннаах 112 бөдөҥ алмааһы 10,3 мөлүйүөн долларга атыылаата.

Хампаанньа пресс-сулууспата иһитиннэрбитинэн, аукциоҥҥа Гонконг, Индия, Израиль, Бельгия, Холбоһуктаах Арабскай Эмираттар уонна Россия хампаанньалара кытыннылар.

Кэлэр аукциону АЛРОСА манна балаҕан ыйыгар ыытыллар ювелирнай быыстапка иитинэн тэрийиэ. Итини тэҥэ эмиэ бу быыстапка чэрчитинэн өҥнөөх бриллианнары батарар аукциону ыытыа.

Бу сылга хампаанньа Гонкоҥҥа норуоттар икки ардыларынааҕы үс аукциону ыытары былааннаабыта. Балартан иккитэ номнуо 20 мөлүйүөн доллары киллэрдэ.