АЛРОСА туттуллубут батарейкалары туһаҕа таһаарыы аахсыйатын саҕалаата

АЛРОСА хампаанньа экологическэй киинэ 2020 сыл бэс ыйыгар Дьокуускайга уонна өрөспүүбүлүкэ атын куораттарыгар туһаттан тахсыбыт батарейкалары хомуйуу аахсыйатын ыытыаҕа. Бу туһунан хампаанньа пресс-сулууспата иһитиннэрэр.

«Элбэх ахсааннаах туһатан тахсыбыт батарейкалар бөххө быраҕыллаллар. Биһиги ыытар аахсыйабыт туттуллубут батарейкалар көннөрү бөххө бырайыллыылара тулалыыр эйгэҕэ, ууга, үүнээйилэргэ куһаҕаннык дьайарын туһунан өйдөбүлү нэһилиэнньэҕэ тириэрдиэ диэн эрэнэбит», — диэн АЛРОСА экологическэй киинин бөҕү хонтуруоллааһын бөлөҕүн салайааччыта Вита Баркарь эттэ.

Хампаанньа 2020 сыл ыам ыйыгар «Мегаполисресурс» хампаанньалар бөлөхтөрүн кытта туттуллубут батарейкалары туһаҕа таһаарыы туһунан дуогабар баттаста. Бэс ыйын устата киин үлэһиттэрэ Дьокуускайга, Мииринэйгэ, Ленскэйгэ, Удачнайга уонна Айхалга туттуллубут батарейкалары хомуйууну ыытыахтара. Тэрилтэлэргэ, улахан маҕаһыыннарга уонна атыы-эргиэн кииннэригэр анал ууруналар туруоруллуохтара.