Алтай балыыһатыгар икки саастаах оҕо өлбүт

Алтай кыраайын Сэбиэскэй оройуонун киин балыыһатыгар Саха сириттэн сылдьар икки саастаах оҕо өлбүт. Бу туһунан ТАСС иһитиннэрэр.

«Оҕо ийэтэ бэйэтин Instagram аккаунугар суруйбутунан, Саха сириттэн сылдьар дьиэ кэргэн Алтайга аймахтарыгар ыалдьыттыы сырыттаҕына кыыс оҕо стакан аҥара итии ууну бэйэтигэр тоҕон балыыһаҕа киирбит», — диэн этиллэр.

Балыыһаҕа бааһын сууйан баран систиэмэ туруорбуттар. Ол кэнниттэн оҕо туруга мөлтөөбүт уонна тохсунньу 11 күнүгэр күнүс тыына быстыбыт.

«Тустаах эбээһинэһи сөптөөхтүк толорбот буолууттан өлүүгэ тириэрдии» ыстатыйанан холуобунай дьыала тэриллибит. Бастакы сабаҕалааһынынан, оҕо өлүүтүн төрүөтүнэн катетер туруоруу кэмигэр хаҥас тыҥатын оһоллооһун буолар.