Алтынньы 18 күнэ — Россияҕа суол үлэһиттэрин күнэ

Алтынньы үһүс баскыһыанньатыгар Россияҕа суол хаһаайыстыбатын үлэһиттэрин уонна бэтэрээннэрин идэлээх бырааһынньыктара бэлиэтэнэр.

Бырааһынньык 1996 сыллаахха олохтоммута. Бастаан автомобильнай тырааныспар уонна суол хаһаайыстыбатын үлэһиттэрин күнэ алтынньы бүтэһик баскыһыанньатыгар бэлиэтэнэр этэ. 2000 сыллаахха Россия бэрэсидьиэнин ыйааҕынан алтынньы үһүс баскыһыанньатыгар көһөрүллүбүтэ.

Росавтодор иһитиннэриитинэн дойду 57 регионугар «Куттала суох уонна хаачыстыбалаах айан суоллара» национальнай бырайыак чэрчитинэн ыытыллар үлэ 80-тан тахса %-на түмүктэннэ. Ол курдук, бүгүҥҥү күҥҥэ эбийиэктэргэ уопсайа 120,5 мөлүйүөнтэн тахса квадратнай миэтэрэ иэннээх асфальт бүрүһүөнэ уурулунна. 2020 сыл түмүгүнэн бу көрдөрүү 137,4 мөлүйүөн квадратнай миэтэрэҕэ тэҥнэһэрэ күүтүллэр.

«Саха сиригэр 2020 сылга суол үлэһиттэрэ национальнай бырайыак чэрчитинэн 211 килэмиэтир усталаах региональнай таһымнаах айан суолларын уонна 23,5 килэмиэтир усталаах Дьокуускай куорат уулуссаларын өрөмүөннүүллэрэ былааннанар», — диэн Ил Дархан Айсен Николаев эҕэрдэтигэр суруйда.

«Быйыл уустук эпидемиологическай быһыы-майгы буолбутун да үрдүнэн, өрөспүүбүлүкэҕэ федеральнай уонна региональнай таһымнаах айан суолларын тутуу, саҥардыы уонна хапытаалынай өрөмүөннээһин үлэлэрэ биир да күҥҥэ тохтооботулар. Ол көмөтүнэн суол үлэһиттэрэ муҥутуур үрдүк көрдөрүүлэри ситистилэр», – диэн өрөспүүбүлүкэ баһылыга эттэ.

2020 сылга «Умнас», «Анаабыр», «Амма», «Нам» региональнай таһымнаах айан суоллар учаастактарыгар улахан далааһыннаах үлэ ыытыллынна. Алтынньы иккис аҥарыгар «Кэбээйи» айан суола «Бүлүү» федеральнай трассаҕа тахсар кэрчигэ үлэҕэ киллэриллиэхтээх. «Бүлүү» федеральнай айан суолугар олус улахан суолталаах түөрт муоста үлэҕэ киирдэ: Миирнэй оройуонугар Аччыгый Ботуобуйа үрэҕи туоруур муоста, Ньурбаҕа — Түүкээн, Сунтаарга — Улахан Муҥур уонна Саһар Үрэх.