Алтынньы 26-27 күннэригэр Дьокуускайга мас тардыһыы турнира ааһыа

Алтынньы 26-27 күннэригэр Дьокуускай куоракка, дьахталларга уонна эр дьоҥҥо «Саҥа ааттар» диэн мас тардыһыыга өрөспүүбүлүкэтээҕи аһаҕас турнир ыытыллар. Бу туһунан «Спорт Якутии» иһитиннэрэр.

Тэрээһин Манчаары Баһылай аатынан «Модун» спортивнай комплекска ааһыа. Эр дьоннорго аҕыс ыйааһын бөлөҕүнэн, Дьахталларга — сэттэ бөлөҕүнэн ыытыллыа.

«Күрэххэ 2001 сылга төрөөбүт уонна онтон аҕа дьон кыттар. Турнир биир ирдэбилинэн кытааччы мас тардыһыыга спорт маастара, эбэтэр маастарга кандидат буолуо суохтаах», — диэн тэрийээччилэр бэлиэтииллэр.

Бүгүн алтынньы 25 күнүгэр мандатнай хамыыһыйа үлэтин саҕалаата. Ону тэҥэ кытааччылар ыйааһыннаныылара уонна сэрэбиэй ааһар.