Алтынньы 28 күнүгэр «Оонньоммотох оруоллар» испиктээкил бастакытын туруоруллуо

«Оонньоммотох оруоллар» диэн ааттаах Мария Боппоенова инсценировкатынан дьүһүйүүнү, режиссер Захар Никитин бүгүн Саха театрын сыанатыгар маҥнайгытын туруоруо. Оруоллары Дьокуускайдааҕы култуура уонна искусство коллеһын устудьуоннара толоруохтара.

Испиктээкил 1940 сыллаахха Ленинград куоракка артыыс идэтигэр үөрэнэ барбыт эдэркээн саха оҕолорун дьылҕаларын кэпсиир. Бу оҕолор үөрэнэр кэмнэригэр Аҕа дойду Улуу сэриитэ саҕаланан, үөрэнэ барбыт 34 эдэр киһиттэн, 15-һэ эрэ тыыннаах дойдуларыгар эргиллибиттэр. Элбэх ыарахаттары, мэһэйдэри  туораабыт ыччаттан кэлин Анастасия Ларионова эрэ артыыс буолбут.

Лениград блокадатыгар түбэспит саха ыччатын туолбатах ыра санааларын туһунан орто саастах дьон  билэр. Оттон билиҥҥи көлүөнэ  соччо-бачча билбэт. Ол иһин  Дьокуускайдааҕы култуура уонна искусство коллеһын иһинэн “Күн Өркөн” ыччат тыйаатыра туруорарга сананна. Туруоруу — Ленинград блокадатын 75 сылыгар ананар.

Испиктээкил Саха тыйаатырын сыанатыгар алтынньы 28 күнүгэр киэһээ 18.00 чаастан, биир кэмҥэ тылбаастанан көстүө. Сэтинньи 13 күнүгэр Москваҕа Саха сирин бастайааннай бэрэстэбиитэлистибэтин «Олоҥхо» саалатыгар туруоруллуо. Оттон сэтинньи 18 күнүгэр Санкт Петербург куорат РГИСИ тыйаатырын кыра саалатыгар көстөрө былааннанар.