Алтынньы 5 күнүгэр — Учуутал күнэ бэлиэтэнэр

Бүгүн, алтынньы 5 күнүгэр, Россия үрдүнэн Учуууталлар идэлээх бырааһынньыктара бэлиэтэнэр. Учуутал күнүн аан бастаан ССРС 1965 сыллаахха бэлиэтээбиттэрэ, урут бу бырааһынньык алтынньы бастакы баскыһыанньатыгар түбэһэрэ.

«Учуутал – хас биирдии киһи олоҕор ураты суолу хаалларар ытык киһи. Биһиги, сиппит-хоппут дьон, оскуолаҕа ииппит-үөрэппит дьоммутун махтана ахтабыт-саныыбыт. Эһиги дойду үүнэр көлүөнэтин уонна ыччатын иитэн-үөрэтэн таһаарар бочуоттаах уонна уустук соругу толорор итэҕэллээх дьоммут буолаҕыт», — диэн Ил Дархан Айсен Николаев учууталларга эҕэрдэ суругар этиллэр.

Бүгүн федеральнай таһымҥа үөрэх эйгэтин сайыннарыыга кэлим дьаһаллар ылыллалларын Ил дархан бэлиэтээтэ: «Үөрэх» национальнай бырайыагы, «Земскэй учуутал» бырагырааманы көдьүүстээхтик олоххо киллэрии, Уһук Илин уонна Арктика педагогтарыгар ураты чэпчэтиилэри оҥоруу.

«Саха Өрөспүүбүлүкэтэ 2024 сылга диэри үөрэх хаачыстыбатынан Россия 15 бастыҥ регионун ахсааныгар киирэр соругу туруорунар. Биһиги иннибитигэр чахчы дьоһун соруктар тураллар, ол эрээри биһиги элбэҕи кыайыахпыт, ситиһиэхпит диэн эрэнэбин. Хас биирдиигитигэр чэгиэн-чэбдик буолууну, тускулаах олоҕу уонна айымньылаах өрө көтөҕүллүүнү баҕарабын! Үөрэнээччилэргит үрдүк көрдөрүүлэринэн уонна билиигэ тардыһыыларынан эһигини мэлдьи үөрдэ турдуннар!», — диэн өрөспүүбүлүкэ баһылыга түмүктээтэ.