Аммаҕа кылгас кээмэйдээх киинэни устууга улуустааҕы күрэх ыытылынна

Амма улууһугар «Бэйэҥ ай» («Создай сам») диэн кылгас кээмэйдээх киинэни устууга улуустааҕы күрэх буолан ааста. Тэрээһин дойду үрдүнэн биллэриллибит тыйаатыр сылын чэрчитинэн ыытылынна.

Мээндиги нэһилиэгин «Алгыс» сынньалан киинэ бу бырайыагын өссө ааспыт сылга саҕалаабыт. Тэрийээччилэр бастаан күрэҕи бэйэлэригэр кэтэхтэн ыытаары гынан баран, Аммаҕа сонун тэрээһин буоллун диэн оройуон киинигэр ыытан көрөргө санаммыттар.

Дьүүллүүр сүбэ көрүүтүгэр түөрт нэһилиэктэн, уопсайа тоҕус үлэ киирбит. Айар дьоҕурдаах дьон үлэтин Дьокуускайтан киинэ уонна тыйаатыр артыыһа Игорь Говоров сыаналаста.

«Киинэ устуутун бэйэм билэр киһи быһыытынан оператор, режиссер үлэлэрин, артыыстар оруолларын хайдах толороллорун, уот-күөс туруутун көрдүм. Ымпыга-чымпыга элбэх. Дьарыгырааччылар устубуттарын өйдөөн, объективнай соҕустук дьүүллээтим. «Үһүөм» уонна «Аҕа» диэн киинэлэр киһини таарыйар наһаа үчүгэй ис хоһоонноохтор. Итини толору киинэ даҕаны гына оҥоруохха сөп», — диэн Саха академическай тыйаатырын артыыһа Игорь Говоров кэпсээтэ.

Бу курдук Мээндигилэр сонун саҕалааһыннара дьон биһирэбилин ылыан ылла. Салгыы бырайыак салҕанан өссө сайдыан наадатын бэлиэтээтилэр.

Онтон күрэх Гран при үрдүк аатын Амматааҕы народнай тыйаатыр устубут «Үһүөм» киинэтэ ылла.