Аммаҕа мүөтүнэн дьарыктанар дьоҥҥо анаан тигээйи иитиитинэн семинар ыытылынна

Амма улууһугар биирдиилээн дьон мүөтүнэн дьарыктаммыттара хаһыс да сылыгар барда. Кинилэргэ кыттыһан саҥа саҕалааччы дьон ахсаана сыллата эбиллэ турар. Мээндиги, Алтан, Майскай нэһилиэктэригэр балайда уопуттаах тигээйини иитээччилэр бааллара биллэр.

Тигээйи иитиитинэн дьарыктаныан баҕалаахтарга Амматааҕы бизнес инкубаторга Дьокуускай куорат Мархатыттан тигээйинэн дьарыктанар Евгений Поличко бэйэтин маастар кылааһын көрдөрдө.

«Саха сирин уустук усулуобуйатыгар тигээйи иитиитинэн дьарыктаммытым сэттис сыла буолла. Сөптөөх ситиһиилэрдээх буолан баҕалаахтары кытта уопут атастаһабын, саҥа саҕалааччыларга сүбэ-ама биэрэбин», – диэн Евгений Поличко кэпсээтэ.

Мүөтүнэн дьарыктанааччылар бэлиэтииллэринэн, хаачыстыбалаах мүөт уонна экологичэскэй өттүнэн ыраас бэйэ бородууксуйатын дьон хамаҕатык ылар. Сылын ахсын Амма минньигэс амтаннаах мүөтүн сэҥээрээччи ахсаана элбээн иһэр.

Маннык тэрээһиннэри бизнес инкубатор дьиэтэ тиһигин быспакка, олохтоохтор интэриэстэрин учуоттаан үгүстүк тэрийэн ыытар.