Амма Болугуругар саҥа хотону үлэҕэ киллэрдилэр

Бүгүн, балаҕан ыйын 2 күнүгэр Амма улууһугар «Болугур» кэтэх хаһаайыстыба үүт сыахтаах хотону үлэҕэ киллэрдэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Саҥа 1500 квадратнай миэтэрэ иэннээх хотон СӨ тыатын хаһаайыстыбатын министиэристибэтин өйөбүлүнэн тутулунна. Манна сүөһүгэ уонна көрөр-истэр үлэһиттэргэ билиҥҥи кэм ирдэбилигэр эппиэттиир бары усулуобуйа тэрилиннэ.

«Үөрүүбүт муҥура суох. Үлэлиир усулуобуйабыт ончу тубуста, инники сэбиэскэй кэмҥэ тутуллубут хотоҥҥо үлэлии сылдьыбыппыт», – диэн техник Галина Устинова кэпсээтэ.

«Болугур» СХПК ынах сүөһүнү уонна саха сылгытын иитииттэн ураты, бурдук ыһыынан уонна оҕуруот аһын үүннэриинэн дьарыктанар.

2015 сылы кытта тэҥнээтэххэ, хаһаайыстыба ынах сүөһү ахсаана быйыл 65-нэн элбээбит уонна 530 төбөҕө тэҥнэспит, ол иһигэр ыанар ынах ахсаана 20-нэн элбээбит. Сылгы ахсаана 115-нэн элбээбит уонна 608 төбөҕө тэҥнэспит, ол иһигэр — 320 биэ.

Ил Дархан Айсен Николаев «Болугур» хаһаайыстыбаны саҥа хотон үлэҕэ киирбитинэн эҕэрдэлээтэ. Уонна Болугур нэһилиэгин баһылыгар «Беларусь» тыраахтарга сертификат туттарда.