Амма улууһугар бөрөлөр сылгыны тартылар

Амма улууһун Олом Күөл учаастагар Чоноойу үрэххэ бөрө үөрэ Николай Константинов бааһынай хааһаайыстыбатын сылгытын тартылар. Хаһаайыстыба уопсайа 200 төбө кэриҥэ сылгылааҕа бэлиэтэнэр.

«Суолларынан көрдөххө биэс-алта бөрө сылдьыбыт. Үүтээнтэн балтараа килэмиэтирдээх сиргэ биэни тардыбыттар. Барытын сиэбиттэр, туга да хаалбатах кэриэтэ. Өлүгүн тохсунньу 25 күнүгэр булбуппут. Чугаһынан өссө үс бөрөлөөх үөр уонна биир соҕотох адьырҕа баар. Кими да тыыта иликтэр, ол эрээри үрэх сүнньүнэн сылдьалларын билэбит», — диэн сылгыһыт Николай Кузьмин кэпсээтэ.

Суолларын сонордоон, Болугур нэһилиэгин Күүлүпчү үрэҕин диэки барбыттара билиннэ. Адьырҕа кыыллар туһунан иһитиннэрии олохтоох булт хаһаайыстыбатыгар тиэрдилиннэ.

«Үс сыллааҕыта бөрөлөр 16 сылгыбын тардыбыттара. Онон олус куттанабын», — диэн Николай Кузьмин иһитиннэрдэ.