Аммаҕа муниципальнай ыксаллаах быһыы-майгы эрэһиимэ биллэрилиннэ

Амма улууһугар ойуур баһаардарыттан сылтаан муниципальнай таһымнаах ыксаллаах быһыы-майгы эрэһиимэ биллэрилиннэ. Бу туһунан улуус баһылыга Николай Архипов иһитиннэрдэ.

«Соморсун нэһилиэгэр хонтуруолланар сиргэ-уокка, Олум диэн сиргэ саҕаламмыт ойуур баһаардара бара тураллар. Тыал күүһүрэн, уот Сэргэ Бэс, Соморсун уонна Мээндиги сэлиэнньэлэрин тыа хаһаайыстыбатын сирдэригэр тиийдэ», — диэн баһылык кэпсээтэ.

Ону тэҥэ ойуур баһаара Эмис нэһилиэгин Олом Күөл бөһүөлэгин сиригэр-уотугар бара турар. Ыксаллаах быһыыга-майгыга хамыыһыйа сүбэ мунньаҕын түмүгүнэн олохтоох бириэмэнэн 11.00 чааска баһаар кыраныыссатын олохтуурга сөмөлүөт ыытар туһунан быһаарыы ылылынна.

Нэһилиэнньэлээх пууҥҥа суоһуур кутталлы быһаарарга биригээдэ таҕыста.