Амур уобалаһыгар локомотив саахалланан Нерюнгри-Тайшет поезд хойутаабыт

«Нерюнгри – Тайшет» хайысханан сылдьар 375 №-дээх пассажирдары таһар поезд Амур уобалаһыгар локомотив рельстан туораабытын иһин хойутаабыт. Бу туһунан Уһук Илин тимир суолларын пресс-сулууспата иһитиннэрэр.

Саахал олунньу 16 күнүгэр Москва бириэмэтинэн 06:40 чааска тахсыбыт. Амур уобалаһын Тында оройуонугар таһаҕас таһар локомотив рельстан туораабыт. Ол түмүгэр «Курьян — Хани» хайысханан сырыы быстах кэмҥэ тохтотуллубут. Поезд машиниһа эчэйии ылбыт, киниэхэ медицинскэй көмө оҥоһуллубут.

Алдьаныыны туоратарга саахал тахсыбыт сиригэр Тында уонна Юкал станцияларыттан чөлүгэр түһэрэр поезтар ыытыллыбыттар. Тимир суолунан сырыыны чөлүгэр түһэрэргэ 10 чаас кэриҥэ ыытыллыбыт. Поеһы бу учаастагынан Москва бириэмэтинэн 16:33 чааска ыыппыттар.

«Саахал тахсан Нерюнгри — Тайшет хайысханан сылдьар 375 №-дээх пассажирдары таһар поезд сырыыта 3,5 чаас хойутаабыт. Тохтобул кэмигэр пассажирдар бары наадалааҕынан хаачыйыллыбыттар», — диэн этиллэр.

Саахал чахчытынан Уһук Илиҥҥи тырааныспар боркуратуурата бэрэбиэркэ тэрийбит.