Андрей Тарасенко Жатайдааҕы суудуна верфэтин тутууну ыксатарга соруйда

Саха өрөспүүбүлүкэтин бырабыыталыстыбатын бэрэссэдээтэлин э.т. Андрей Тарасенко Жатайдааҕы суудуна верфэтин тутуу тэтимин ыксатарга соруйда. Бу туһунан СӨ баһылыгын уонна бырабыыталыстыбатын дьаһалтатытн пресс-сулууспата иһитиннэрэр.

«Икки нэдиэлэ буола-буола эбийиэги бэрэбиэркэлиибит — хамсааһын баар. Ол да буоллар, аан бастакытын атырдьах ыйын 9 күнүгэр сылдьыахпыттан үлэһит ахсаана икки төгүл элбээбитин үрдүнэн, үлэ бытааннык ыытыллар. Билигин бэдээрэччиктэртэн бетону кутуу уонна тимир конструкциялары таҥыы үлэлэрин түргэтэтиини ирдиибит», – диэн Андрей Тарасенко бэйэтин Twitter аккаунугар суруйда.

Суудуна верфэтин бырайыага «Шельфовой баайдаах сирдэри баһылыырга суудуналары тутуу уонна муора тиэхиньикэтин сайыннарыы» судаарыстыбаннай бырагыраама чэрчитинэн үбүлэнэр.

Жатайдааҕы суудуна верфэтин тутуу бастакы түһүмэҕэ 2021 сылга түмүктэниэхтээх. Бырайыак бастакы түһүмэҕин уопсай үбүлээһинэ 5,7 миллиард солкуобайга тэҕнэһэр. 2022 сылтан Жатайдааҕы верфэ баазатыгар сыллата уонча өрүс суудунатын оҥорон таһаарыы былааннаахтар.