Антисептик испит дьон санрейсинэн Дьокуускайга ыытылыннылар

Түөрт антисептик испит дьону Тааттаттан санитарнай рейсинэн Дьокуускайга өрөспүүбүлүкэтээҕи 2-с №-дээх балыыһаҕа аҕалыахтара. Бу туһунан СӨ доруобуйа харыстабылыгар миниистирэ Елена Борисова иһитиннэрдэ.

Инники этиллибитинэн, 32 саастаах эр киһи ыарахан туруктааҕа биллэр. Өссө үс киһи балыыһаҕа медиктэр кэтээн көрүүлэригэр сытар, кинилэр олохторугар куттал суоһаабат.

Санатар буоллахха, 2020 сыл сэтинньи 18 күнүгэр Таатта улууһун Томтор сэлиэнньэтигэр тоҕус киһилээх хампаанньа чааһынай дьиэҕэ испиирдээх утаҕы испиттэр. Сарсыныгар 41 саастаах дьахтар дьиэтигэр, 27 уонна 59 саастаах икки эр киһи балыыһа реанимациялыыр салаатыгар өлбүттэр.

Бүгүн, сэтинньи 20 күнүгэр, Таатта улуустааҕы киин балыыһатын реанимациялыыр салаатыгар 28 уонна 69 саастаах икки эр киһи тыына быстыбыт.

Сэрэҕэ суохтук быһыыланыыттан дьон өлүүтүн чахчытынан холуобунай дьыала тэрилиннэ.