Антонина Григорьева: Оскуола оҕолорун сылаас аһылыгынан хааччыйарга сокуоҥҥа уларытыылары киллэрии ирдэнэр

Россия бэрэсидьиэнэ Владимир Путин оскуола оҕолорун сылаас аһылыгынан хаччыйыы туһунан эппит туһаайыытын олоххо киллэрэргэ сокуоҥҥа улахан уларытыылары киллэрии уонна салайааччылар түргэн быһаарыылара ирдэнэрин туһунан Ил Түмэн бэрэссэдээтэлин солбуйааччыта Антонина Григорьева иһитиннэрдэ.

«Оскуола оҕолорун сылаас аһылыгынан хааччыйарга элбэх боппуруоһу быһаарыахпытын наада. Олор истэригэр: аһылык хаачыстыбата, олохтоох бородууксуйаттан оҥоһуллара, анал оборудование, оҕолор аһыыр сирдэрэ уо.д.а.», — диэн Антонина Григорьева кэпсээтэ.

Өрөспүүбүлүкэҕэ оскуолаҕа киирэ илик оҕолор иитиллээччилэрин аһынан хааччыйыы боппуруоһа быһаарыллан турарын, сүрүн тэрээһин уонна сокуон үлэтэ оскуолалары таарыйарын, онуоха киин куоракка оҕо аһын хааччыйар кэмбинээт бүгүҥҥү күҥҥэ диэри суоҕун ыйда.

«Өрөспүүбүлүкэ улуустарын кииннэригэр 4-6 маҥнайгы кылаас баар. Сорох үөрэх кыһаларыгар алын кылаас оҕолорун барыларын биир кэмҥэ аһатар уустуктардаах. Дьокуускай куорат сорох оскуолаларыгар буфеттар бааллар, ол эрээри толору хааччыллыылаах остолобуойдара суох. Туруоруллубут сыалы ситиһэргэ оҕолору аһатар сир хайдах тэриллиилээх буоларын быһарыахха наада: эбии тутуу эбэтэр туспа эбийиэк», — диэн эттэ.

Дойду баһылыгын туһаайыытыгар социальнай эйгэни таарыйар боппуруостар нэһилиэнньэ сүрүн болҕомтотун ылбыттарын тоһоҕолоото. Этииллибит миэрэлэр улахан аҥардара дьиэ кэргэҥҥэ өйөбүл буоларын вице-спикер бэлиэтээтэ.

Санаттахха, 2023 сыл балаҕан ыйын 1 күнүгэр диэри алын кылаас оҕолорун босхо хаачыстыбаннай сылаас аһынан хааччыйыы туһунан бэрэсидьиэн Владимир Путин федерация мунньаҕар быйылгы туһаайыытыгар этэн турар.