«Арктика гектара» сокуон барыла бырабыыталыстыба көрүүтүгэр киирдэ

Россия Уһук Илини уонна Арктиканы сайыннарыыга министиэристибэтэ Арктикаҕа босхо сир учаастагын ылыы туһунан сокуон барылын бырабыыталыстыба көрүүтүгэр киллэрдэ. Бу туһунан ТАСС иһитиннэрэр.

«Докумуоҥҥа «Уһук Илиҥҥи гектар» федеральнай сокуон барылыгар уларытыылары киллэрии туһунан этиллэр. Бастакы алта ый устата Арктикаҕа сир учаастагын ылар быраап тустаах регионнарга уонна муниципальнай тэриллиилэргэ регистрациялаах олохтоохторко көрүллүөҕэ», — диэн этиллэр.

Алта ый кэнниттэн маннык быраап дойду бары олохтоохторугар бэриллиэҕэ, ону тэҥэ тас дойдуларга олорор уонна Россияҕа көһөн кэлиэн баҕарар биир дойдулаахтарбытыгар.

Биир гектар иэннээх сир учаастагын биэс сыл болдьохтоох босхо туһаныыга, ол кэнниттэн бас билиигэ эбэтэр уһун болдьохтоох куортамҥа ылыахха сөп. Учаастака дьиэ туттуохха, хаһаайыстыба тэриниэххэ, нэһилиэнньэҕэ араас өҥөнү оҥоруохха, ол иһигэр туристическай бизнеһынан дьарыктаныахха сөбө бэлиэтэнэр.