Арктика резиденэ буолар бырайыактарга инвестиционнай боруок аччыан сөп

Сири байытыыттан ураты атын хайысхаларынан дьарыктанар Арктика резиденэ буолуон баҕалаах саҥа бырайыактар инвестиционнай боруоктара 10 мөлүйүөнтэн 1-3 мөлүйүөҥҥэ тиийэ аччыан сөп. Бу туһунан ТАСС тириэрдэр.

Бу туһунан Россия бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Арктикаҕа саҥа бырайыактары олоххо киллэрэр инвестордарга чэпчэтиилэри көрүү туһунан сокуон барылларын дьүүллэһэр сүбэ мунньах кэнниттэн суруналыыстарга иһитиннэрдэ.

Инники киирбит уларытыыларынан, Арктикаҕа киирсэр сиргэ регистрацияламмыт, ону тэҥэ 10 мөлүйүөн солкуобайтан аҕыйаҕа суох суумалаах саҥа инвестиционнай бырайыактары олоххо киллэрэр хампаанньалар, эбэтэр урбаанньыттар Арктика резиденин статуһун ылаллар уонна кэккэ нолуогабай уонна да атын чэпчэтиилэргэ тиксэллэр. Олор истэригэр көҥүл таможеннай зона уонна төгүрүк сууккалаах аһардар пууннар баар буолуохтарын сөбө сабаҕаланар.

Ону таһынан сокуон барылынан инвестордарга сир учаастагын чэпчэтиллибит ирдэбилинэн биэрии болдьоҕун кылгатыы, бэрэбиэркэлэртэн босхолооһун уонна кинилэр интэриэстэрин суукка көмүскээһин туһунан этиллэр.

«Чэпчэтиилэр систиэмэлэригэр сир анныттан хостонор саппаас баайы оҥорон таһаарар бырайыактарга эбии льготалар көрүллэллэрэ былааннанар. Маны барытан Россия Уһук Илини уонна Арктиканы сайыннарыыга министиэристибэтэ бэлэмниэҕэ», — диэн Юрий Трутнев түмүктээтэ.