Ат сүүрдүүтэ НВК «Саха» ханаалга быһа эфиргэ көстүөҕэ

Балаҕан ыйын 19 күнүгэр буолуохтаах Улуу Кыайыы 75 сылыгар анаммыт ат сүүрдүүтэ НВК «Саха» ханаал быһа эфиригэр көстүөҕэ.

Сэттэ дистанцияҕа сүүрүөхтэрэ. Хас биирдии дистанция Аҕа дойду Улуу сэриитин дьоруойдарыгар уонна бэтэрээннэригэр ананыаҕа.

1000 миэтэрэҕэ сүүрдүү Бүлүүттэн төрүттээн Сэбиэскэй сойуус дьоруойа Николай Кондаковка, 1600 миэтэрэҕэ Саха сиригэр төрөөбүт боруода аттары сүүрдүү Социалистическай үлэ дьоруойа, «Хорсунун иһин» мэтээл хаһаайына Петр Яковлевка ананыаҕа. 1600 миэтэрэҕэ өссө биир сүүрдүүгэ бирииһи Мэҥэ Хаҥалас улууһа туруорбут, дистанция Дьоруой Федор Поповка ананар. 1600 миэтэрэҕэ төрдүс дистанция Ньурбаттан Дьоруой Николай Чусовскойга, бэһис дистанцияҕа сүүрдүү Дьоруой Томпо улууһуттан төрүттээх Федор Охлопковка ананыаҕа. 2000 миэтэрэҕэ дистанция ат сүүрдүүтэ сэрии бэтэрээннэрин кэриэһигэр буолуоҕа. «Бу дистанция Чурапчы улууһун чулуу уолаттарыгар ананар, кыайыылаах «Хорсунун иһин», «За оборону Сталинграда, «За взятие Берлина», «За освобождение Варшавы», «За победу над Германией» мэтээллэр уонна Аҕа дойду Улуу сэриитин I истиэпэннээх уордьанын хаһаайына Гаврил Протодьяконов аатынан бирииһинэн наҕараадаланыаҕа, иккис миэстэ алта бойобуой уордьан кавалера Семен Флегонтов аатынан бирииһи ылыаҕа, үһүс миэстэҕэ снайпер, түөрт бойобуой уордьан кавалера Георгий Федоров аатынан анал бирииһи тутуоҕа», – диэн арктикатааҕы судаарыстыбаннай университет иһитиннэрэр. 3200 миэтэрэҕэ түмүктүүр дистанция снайпе Иван Кульбертиновка ананар — бирииһи Өлүөхүмэ оройуона туруорар.

Ат сүүрдүүтэ көрөөччүтэ суох ыытыллар. Быһа эфир саха телевидениетигэр Саха сирин бүттүүнүгэр көстүөхтээх.