Бүгүн, алтынньы 18 күнүгэр Саха сиригэр — Ийэ күнэ бэлиэтэнэр

Алтынньы үһүс баскыһыанньата Саха сиригэр — Ийэ күнэ. Быйыл бу бырааһынньык бүгүн, алтынньы 18 күнүгэр түбэһэр. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

1993 сыл балаҕан ыйын 2 күнүгэр СӨ  бастакы бэрэсидьиэнэ Михаил Николаев 532-с №-дээх ыйааҕынан Саха сиригэр «Ийэ күнэ» бигэргэммитэ. Ийэлэргэ анаммыт өссө биир бырааһынньык, бүтүн Россиятааҕы Ийэ күнэ — сэтинньи бүтэһик баскыһыанньатыгар бэлиэтэнэр.

«Олохпут аан бастакы күннэриттэн ийэбит биһигини бэйэтин тапталынан уонна сылааһынан бүөбэйдээн, аһатан, иитэн-үөрэтэн, кэлэр кэскилбит хайысхаларын ыйар уонна олохпут суолтатын биэрэр. Оҕо ийэтигэр убаныытыттан уонна тапталыттан тулалыыр эйгэҕэ эрэлэ, кини олоҕун хаамыыта, кыайыылара уонна стиһиилэрэ саҕаланаллар», – диэн Ил Дархан Айсен Николаев бэйэтин эҕэрдэ суругар эттэ.

Саха сиригэр ийэ уонна оҕо саас көмүскэлигэр, эдэр ийэлэри уонна элбэх оҕолоох дьиэ кэргэттэри өйөөһүҥҥэ куруутун улахан болҕомто уурулларын өрөспүүбүлүкэ баһылыга бэлиэтээтэ. Оҕолоох дьиэ кэргэттэри өйөөһүҥҥэ, демографияны тупсарыыга, дьиэ кэргэн сыаннастарын институтун статуһун үрдэтэргэ туһаайыллар социальнай-экономическэй тэрээһиннэр олоххо киллэриллэллэр.

Ийэ күнүгэр ананар тэрээһиннэр быйыл онлайн быһыылаах ыытыллыахтара: быыстапкалар, экскурсиялар, маастар кылаастар, төгүрүк остуоллар, аахсыйалар, хаартыска куонкурустара и шахмат күрэҕэ.