Бүгүн Дьокуускай телебашнятын уота холбонуоҕа

Бүгүн, атырдьах ыйын 13 күнүгэр «Россия телевидениетин уонна радионан иһитиннэриитин ситимэ» (РТРС) тэриллибит күнүнэн сибээстээн киин куорат телебашнятын уота холбонуоҕа. Бу туһунан СӨ инновацияҕа министиэристибэтин пресс-сулууспата иһитиннэрэр.

Дьокуускай телебашнята атырдьах ыйын 13 күнүгэр 21.00 чаастан — 00.00 чааска диэри умайыаҕа.

«Россия телевидениетин уонна радионан иһитиннэриитин ситимэ» 2001 сыл атырдьах ыйын 13 күнүгэр Россия бэрэсидьиэнин ыйааҕынан төрүттэммитэ. Россия стратегическай тэрилтэлэрин испииһэгэр киирэр.

Сиринэн иһитиннэриилэри тарҕатар ситим Россия регионнарыгар баар 78 региональнай, өрөспүүбүлүкэтээҕи, кыраайдааҕы уонна уобаластааҕы радиотелевизионнай кииннэри хааччыйар. РТРС ситимэ 20 000-тан тахса телевидение биэриилэрин тарҕатар тэриллэри (цифровойу ааҕан туран) уонна 2700-кэ радиопередатчигы хабар.