Бүгүн Дьокуускайга экс-миниистир Александр Борисовы ахтан аастылар

Бүгүн, атырдьах ыйын 3 күнүгэр СӨ сибээскэ уонна инновационнай технологияларга урукку миниистирэ Александр Борисов кэриэһин үйэтитэр дуоскаҕа сибэкки дьөрбөтүн ууруу буолан ааста. Бу туһунан СӨ инновацияҕа, цифровой сайдыыга уонна ифокоммуникационнай технологияларга министиэристибэтин пресс-сулууспата иһитиннэрэр.

Мемориальнай дуоска быйыл 2020 сыл саас «Телевидение уонна радионан иһитиннэрии техническэй киинэ» ГУП дьиэтигэр арыллыбыта. Бүгүҥҥү тэрээһиҥҥэ дьиэ кэргэнэ, бииргэ үлэлээбит кэллиэгэлэрэ уонна доҕотторо кыттыыны ыллылар.

«Александр Ильич салалтатынан Саха сирин телевидениетин уонна радионан иһитиннэриитин сайдыытын стратегическэй бырагыраамата бэлэмнэнэн олоххо киирбитэ, техническэй бааза саҥардыллыбыта, Дьокуускайга, Ленскэйгэ уонна өрөспүүбүлүкэ улуустарын кииннэригэр саҥа эбийиэктэр — телевидение кииннэрэ тутуллубуттара», — диэн өрөспүүбүлүкэтээҕи телевизионнай киин генеральнай дириэктэрэ Андрей Ребров эттэ.

Өрөспүүбүлүкэҕэ киэҥ хабааннаах региональнай спутниковай телевизорунан, радионан иһитиннэрии ситимин олоххо киллэрии көмөтүнэн, Саха сирэ тутулуга суох информационнай эйгэлэммитэ Александр Борисов өссө биир сүрүн кылаата буоларын тоһоҕолоото.

Ону таһынан Александр Ильич үлэтин үтүө түмүгүнэн саҥа былаас уорганнарын тэрийии буоларын, олор истэригэр дойду үрдүнэн бастыҥ региональнай быһаарыны буолбут элбэх хайысхалаах киин (МФЦ) тэриллиитин ыйда.

Александр Борисов көмөтүнэн өрөспүүбүлүкэҕэ оптоволоконнай сибээс ситимин тардыы боппуруоһа быһаарыллыбыта, «Халыматааҕы экспресс», «Кэбээйитээҕи экспресс» уонна «Бүлүүтээҕи экспресс» баар буолбуттара.

Министиэристибэ иһинэн тэриллибит «Үтүө сүрэх» аһымал бырайыак көмөтүнэн, оҕолору эмтээһиҥҥэ 10 мөлүйүөн кэриҥэ солкуобай хомуллубутун кэргэнэ сырдатта.

Үбүлүөйүн көрсө «Александр Борисов «Быстыспат сибээс» кинигэ күн сирин көрдө. Тираж 500 экземплярга тэҥнэһэр. Кинигэ сүрэхтэниитэ эпидемиологическэй балаһыанньа оннугар киирдэҕинэ, күһүн ахтыы киэһэтигэр былааннанар.

Александр Борисов —Россия Федерациятын сибээһин маастара, Саха сирин сибээһин үтүөлээх үлэһитэ, Петр Дудкин аатынан сибээскэ уонна информационнай технологияларга өрөспүүбүлүкэ судаарыстыбаннай бириэмийэтин лауреата, Хаҥалас улууһун бочуоттаах олохтооҕо. «Гражданскай килбиэн» бэлиэ хаһаайына.

Бүгүн, атырдьах ыйын 3 күнүгэр 60 сааһын туолуо этэ.