Бүгүн Ил Түмэн бырабыыталыстыба дуоһунастарыгар хандьыдааттары аныа

Бүгүн, сэтинньи 10 күнүгэр Ил Түмэн XXI-с уочараттаах пленарнай мунньаҕар Ил Дархаҥҥа өрөспүүбүлүкэ бырабыыталыстыбатын чилиэттэрин аныырга сөбүлэҥи биэрии боппуруоһа көрүллүөҕэ. Бу туһунан СӨ баһылыгын уонна бырабыыталыстыбатын дьаһалтатын пресс-ссулууспата иһитиннэрэр.

Ол курдук, бүгүҥҥү уочараттаах мунньахха Андрей Тарасенконы — Саха өрөспүүбүлүкэтин бырабыыталыстыбатын бэрэссэдээтэлин дуоһунаһыгар хандьыдаатынан анааһын, Кирилл Бычковы — өрөспүүбүлүкэ бырабыыталыстыбатын бэрэссэдээтэлин бастакы солбуйааччытын дуоһунаһыгар хандьыдаатынан анааһын, Сергей Местниковы уонна Михаил Никифоровы – өрөспүүбүлүкэ бырабыыталыстыбатын бэрэссэдээтэлин солбуйааччыларын дуоһунастарыгар хандьыдааттарынан анааһын, Павел Ивановы – Саха өрөспүүбүлүкэтин баайга-дуолга уонна сиргэ сыһыан миниистирин дуоһунаһыгар хандьыдаатынан анааһын боппуруостара көрүллүөхтэрэ.

Ил Дархан Айсен Николаев хандьыдааттары дьокутааттарга билиһиннэриэ.

Ону тэҥэ мунньах бэбиэскэтин бырайыагар Ил Дархан киллэрибит икки өрөспүүбүлүкэ таһымнаах сокуон бырайыага көрүллүө: «Саха сирин нолуогабай бэлиитикэтин туһунан» сокуоҥҥа уларытыылары киллэрии уонна олохтоох бэйэни салайыныы уорганнарыгар тыа хаһаайыстыбатын өйөөһүҥҥэ туспа боломуочуйалары анааһын туһунан.