Бүгүн норуот тапталлаах ырыаһыта Валерий Ноев төрөөбүт күнэ

Бу бэлиэ күн Валерий Ноев ырыаларын куорат киин уулуссаларыгар биир чаас устата тыаһаттылар. Маны сэргэ чугас дьоно, бииргэ алтыспыт үөлээннээхтэрэ кинини ахтан-санаан аастылар.

Сахаҕа төрөөбүт алааһын, дойдутун санатар ырыалардаах талааннаах киһи баара буоллар, бүгүн 80 сааһын туолуох этэ. Кини төһө да кылгас олоҕу олордор, сүрэх, дууһа кылын таарыйар ырыалары айан хаалларбыта.

Ырыатыгар ылламмыт кыракый кыысчаана номнуо улаатан, билигин Дьокуускай куорат 17 №-дээх оскуолатыгар математика учууталынан үлэлиир. Аҕата кини кыра эрдэҕинэ күн сириттэн күрэммитэ, ол гынан баран аҕабын кини ырыаларын нөҥүө билбитим диэн Анастасия Чирикова этэр.

Талааннаах киһи аатын үйэтитэр тэрээһиннэр салгыы салҕаналлар. Төрөөбүт Алтаныгар, олорбут-үлэлээбит Бэдьимэтигэр үгэс курдук «Мин дууһам ыллыыр» диэн өрөспүүбүлүкэтээҕи ырыа күрэҕэ тэриллэр. Ону таһынан кини аата култуура киинигэр иҥэриллибитэ,  кинигэҕэ киирибитэ.

Валерий Ноев ырыаларын норуот ыллыырын тухары, биллиилээх мелодист аата-суола умнуллуо, сүтэн, симэлийэн хаалыа суоҕа. Оттон үбүлүөйдээх түмүктүүр тэрээһин ахсынньы 7 күнүгэр Дьокуускайга буолуоҕа. Бу дьоро киэһэҕэ талааннаах мелодистка анаммыт кинигэ күн сирин көрүө.