Бүгүн Саха Өрөспүүбүлүкэтин судаарыстыбаннаһын күнэ бэлиэтэнэр

Бүгүн, балаҕан ыйын 27 күнүгэр Саха сирин судаарыстыбаннай суверенитетын туһунан Декларация ылыллыбыта 30 сылын бэлиэтиибит.

1922 сыл муус устар ыйыгар Саха сирэ РСФСР састаабыгар киирэн автономнай өрөспүүбүлүкэ статуһун ылбыта. 1990 сыл балаҕан ыйын 27 күнүгэр судаарыстыбаннай суверенитетын туһунан Декларация ылыллыбыта. Онтон ылата балаҕан ыйын 27 күнүгэр Саха Өрөспүүбүлүкэтин судаарыстыбаннаһын күнэ бэлиэтэнэр.

Өрөспүүбүлүкэ былааҕа уонна гиэрбэтэ 1992 сыл алтынньы уонна ахсынньы ыйдарыгар бигэргэммиттэрэ. Судаарыстыбаннай бэлиэлэри оҥорууга саха норуотун историческай уонна култуурнай үгэстэрэ учуоттаммыттара. Өрөспүүбүлүкэ сүрүн сокуона — Төрүт сокуон 1992 сыллаахха ылыллыбыта.

«Саха Өрөспүүбүлүкэтэ бүгүн – элбэх омуктаах Россия судаарыстыбатын биир эрчимнээхтик сайдар субъега. Саха сирэ Уһук Илиҥҥи регионнар ортолоругар социальнай-экономическай сайдыытын тэтиминэн бастыҥнар ахсааннарыгар сылдьар», — диэн Ил Дархан Айсен Николаев бэйэтин эҕэрдэтигэр суруйда.

Бүгүҥҥү күҥҥэ гааһы уонна ньиэби хостуур үлэ Саха сиринээҕи киинин тэрийии салгыы ыытыллар, бу соторутааҕыта биһиги Россияҕа чоҕу хостуур бөдөҥ шахта бастакы уочаратын – “Инаглинскайы” уонна “Инаглинскай-2” хайа-байытар фабриканы, Хабаровскай кыраайга “Колмар” хампаанньа туппут “ВаниноТрансУголь” чох бөдөҥ терминалын бастакы уочаратын үлэҕэ киллэрии туоһуларынан буоллубут. Маннык киэҥ хабааннаах бырайыактары олоххо киллэрии өрөспүүбүлүкэ бүтүн Россияны өрө таһаарыыга, кыаҕын бөҕөргөтүүгэ сүҥкэн кылаата буоларын Ил Дархан бэлиэтээтэ.

Өрөспүүбүлүкэ киин куоратыгар судаарыстыбаннай-чааһынай бииргэ үлэлэһии чэрчитинэн 12 социальнай эбийиэк тутуллан үлэҕэ киирдэ: түөрт оскуола, биэс оҕо уһуйаана, оҕо искуустубатын оскуолата, Уһук Илиҥҥэ бастакы Smart-библиотека уонна Юрий Гагарин аатынан Култуура уонна аныгы искуустуба киинэ.

Федеральнай бырабыыталыстыба өйөбүлүнэн Дьокуускайга доруобуйа харыстабылын бөдөҥ эбийиэктэрин – Онкологическай уонна Кардиологическай диспансердары тутуу салҕанар.

«Инники өттүгэр биһигини саҥа бырайыактар, умнуллубат кэрэ түгэннэр, кыайыылар уонна үрдүк ситиһиилэр күүтэллэр. Эһиги хас биирдиигит дьон олоҕун хаачыстыбатын төрдүттэн тупсарарга, өрөспүүбүлүкэ социальнай-экономическай сайдыытынан инники күөҥҥэ тахсарыгар бэйэтин үлэтинэн сүҥкэн кылааты киллэрэр», — диэн Айсен Николаев эттэ.